Ny trasé og dobbelspor Arna-Voss

Jernbaneverket og Statens Vegvesen la 1. april 2014 fram ei felles Konseptvalutgreiing (KVU) for strekninga Arna-Voss. KVU-rapporten tilrår det såkalla K5-alternativet "Stor innkorting bane og veg - kombinasjonsløysing". K5-alternativet inneber at veg og bane skal gå side om side, med nye tunellar og betydeleg innkorting av køyretid. Jernbanetunellane skal fungere som rømningstunell for vegen og vice versa.

For vegen snakkar vi om ei køyretid frå Bergen til Voss på 45 minuttar. Det blir 4-feltsveg mellom Arna og Romslo, deretter 2-feltsveg til Voss, og det blir midtdelar langs heile strekninga.  

Jernbanen vil få ei køyretid på 32 minuttar frå Bergen til Voss, ein reduksjon i høve dagens køyretid på omlag tre kvarter! Jernbanen vil få dobbelspor heile vegen og vil dermed få ein svært stor auke i kapasiteten, i tillegg til at ein ny infrastruktur vil gje langt høgare driftssikkerhet og betre komfort. Med denne løysinga vil Voss og distriktet rundt bli ein integrert del av ein felles bu og arbeidsmarknad rundt Bergen. Bergensbanen får med Ringeriksbanen og nytt dobbelspor Bergen-Voss ein reduksjon i køyretida på nesten 2 timar, i tillegg til auka kapasitet og betre komfort, og vil dermed få ei langt sterkare konkurransekraft. 

Jernbaneverket og Statens Vegvesen tilrår at prosjekta vert gjennomført som eit fellesprosjekt der veg og jernbane vert bygd ut samstundes, med samla investering og organisering. Eit slikt fellesprosjekt er estimert å ha ein totalkostnad på 33 milliardar kroner. Om prosjekta skulle verte bygd kvar for seg, ville dette gje ein tilleggskostnad på omlag 11 milliardar kroner. Både Jernbaneverket og Statens Vegvesen prioriterer å bygge strekninga Arna - Vaksdal først. Med samtidig utbygging av jernbane og veg kan denne strekninga gjennomførast til ein kostnad på 9 mrd. kr. Strekninga Vaksdal - Voss vil krevje ei samla investering på 24 mrd. kr.



 
Les meir:
KVU Rapport Arna-Voss